Forum

Xhensila

Pyetje: Pasi Komisioni ka përllogaritur fondin limit për blerjet e thjeshta me vlerë nën 100000 lekë dhe vlera e fondit të përllogaritur është 80000 lekë pa TVSH. Në procesin e vlerësimit të ofertave komisioni përzgjedh si ofertën fituese një operator i cili ka ofertuar një vlerë prej 80000 lekë pa TVSH ? Cili është raporti midis vlerës së fondit limit të përllogaritur dhe vlerës së ofertuar? Pra Komisioni duhet të zgjedhë një ofertë që është e barabartë me vlerën 80000 apo dhe një ofertë nën këtë vlerë.Duke ju falenderuar!

Përgjigje: Përshëndetje Xhensila,
Faleminderit për pyetjen tuaj.
Në rastin e procedurave të blerjeve të thjeshta, kur fondi limit i përcaktuar nga Komisioni është 80,000 lekë pa TVSH, kjo shumë përfaqëson vlerën maksimale të lejuar që mund të pranohet si ofertë e vlefshme.
Komisioni mund të shpallë fituese një ofertë që është:
-E barabartë me fondin limit (pra, 80,000 lekë), ose
-Më e ulët se fondi limit (p.sh. 75,000 lekë), nëse përmbush kriteret e tjera ligjore dhe teknike.

Ajo që nuk lejohet, është shpallja fituese e një oferte me vlerë mbi fondin limit, pasi kjo do të tejkalonte kufirin e miratuar për kontratën dhe do të binte në kundërshtim me legjislacionin në fuqi.
Prandaj, në shembullin tuaj, oferta me vlerë 80,000 lekë është plotësisht në përputhje me fondin limit dhe mund të shpallet fituese, nëse përmbush edhe kriteret e tjera të tenderit.

Faleminderit për interesin, dhe mbetemi në dispozicion për çdo sqarim të mëtejshëm.

Mikaela

Pyetje: Pershendetje, Bazuar në pikën b) të nenit 56 të VKM Nr. 285, qe citon ",,,studimit të tregut, bazuar në mesataren e çmimeve të marra nga ky studim; ose/dhe,,," per pellogaritjen e fondit limit te kontrates. Ka ndonje format/ tabele/formule specifike per llogaritjen e cmimit mesatar, apo te mjaftohemi me formulen A+B+B/3 ? Faleminderit!
Përgjigje: Faleminderit për pyetjen tuaj.
Bazuar në pikën b) të nenit 76 të VKM nr. 285, datë 19.5.2021, “Për miratimin e rregullave të prokurimit publik”, i ndryshuar, llogaritja e fondit limit mund të bëhet nëpërmjet mesatares së çmimeve të dala nga studimi i tregut. Edhe pse akti normativ nuk përcakton një formulë të detyrueshme matematikore (p.sh. A+B+C/3), është e rëndësishme që metoda e llogaritjes të jetë e dokumentuar, transparente dhe e justifikuar në raportin e studimit të tregut.

OBP rekomandon që për llogaritjen e çmimit mesatar:
- Të merren të paktën 3 oferta reale nga tregu;
-Të përjashtohen ofertat jashtëzakonisht të ulëta ose të larta, kur ka devijime të mëdha;
-Të aplikohet një mesatare aritmetike e çmimeve të vlefshme; nëse përdoret një formulë alternative si A+B+C/3, ajo duhet të shoqërohet me arsyetimin përkatës.

Në rastet kur përdoret një tabelë ose format specifik, kjo lidhet me natyrën e mallrave apo shërbimeve dhe duhet të pasqyrojë besueshmëri dhe objektivitet në përcaktimin e vlerës së tregut.
Ju faleminderit për interesin, dhe mbetemi në dispozicion për çdo sqarim shtesë.

Mikaela

Pyetje: Pershendetje, Pytje per procedurat e blerjeve me vlere nen 100.000 LEK. Ne perllogaritjen e vleres limit te kontrates per blerje materialesh pastrimi i jam referuar cmimeve te botuara nga OPB ne katalog.g, cmime qe i referohen mesatares se tregut pa tvsh. Ne perzgjedjen e OE fitues Komisioni duhet te vazhdoje me te njejtin kriter, pra nga 3 oferta ekonomike Komisioni zgjedh si fitues OE qe ka oferten mesatare? Apo OE qe paraqet oferten me te ulet? Duke ju falenderuar!
Përgjigje: Përshëndetje Mikaela,
Së pari, ju falënderojmë që keni përzgjedhur katalogun e hartuar dhe miratuar nga Operatori i Blerjeve të Përqendruara, i cili është publikuar jo vetëm në faqen zyrtare të Operatorit, por edhe në faqen zyrtare të Agjencisë së Prokurimit Publik, për përllogaritjen e vlerës limit. Vlen të theksohet se këta katalogë ofrojnë çmime të konsoliduara, të mbështetura në studime dhe analiza të tregut, duke rritur transparencën, objektivitetin dhe unifikimin e praktikave ndërinstitucionale.
Së dyti, neni 11 i VKM-së nr. 285, datë 19.05.2021 “Për miratimin e rregullave të prokurimit publik”, i ndryshuar, parashikon që autoritetet kontraktore mund të përdorin procedura të thjeshtuara, siç është blerja me vlerë nën 100 000 lekë, për objekte që përfshijnë mallra dhe shërbime të ngjashme, vlera e përllogaritur e të cilave, brenda një viti kalendarik, nuk tejkalon shumën prej 100 000 (njëqind mijë) lekësh. Për këtë lloj procedure, Autoritetet Kontraktore mund të realizojnë blerje përmes një procesi të thjeshtuar, që përfshin kërkesën për oferta dhe përzgjedhjen mbi bazën e çmimit më të ulët të vlefshëm. Përdorimi i çmimeve të katalogut të OPB-së në këtë rast ka vetëm qëllim përcaktimin e vlerës limit dhe nuk ndikon në kriterin e përzgjedhjes së ofertës fituese. Në përfundim, përzgjedhja e ofertës fituese në blerjet me vlerë nën 100 000 (njëqind mijë) lekë dhe në procedurat me vlerë të vogël bëhet mbi bazën e çmimit më të ulët.
Ju urojmë punë të mbarë!

Marsi

Pyetje: A zbatohet nje filter ne menyre qe nje OE i cili ka nje M.K te lidhur me nje AK, te mos konkuroje perseri per nje objekt te dyte prokurimi(te ngjashem me te parin), pasi si fuqia punetore ashtu edhe ana ekonomike e tij nuk perballon zbatimin me sukses te dy M.K njekohesisht me A.K te ndryshem?
Përgjigje: Faleminderit për pyetjen tuaj.
Ligji nr. 162/2020 “Për prokurimin publik”, i ndryshuar, nuk ndalon në mënyrë automatike që një operator ekonomik (OE) i cili ka një kontratë ekzistuese me një autoritet kontraktor (AK), të marrë pjesë edhe në një procedurë tjetër prokurimi për një objekt të ngjashëm. Megjithatë, ekziston një filtër funksional dhe ligjor që quhet “kapaciteti ekonomik dhe teknik”, i cili zbaton pikërisht këtë parim që ju ngrini nese parashikohet nga AK.

Si kontrollohet kjo në praktikë?
Gjatë procedurës së vlerësimit, autoriteti kontraktor:
1. Vendos kritere të qarta kualifikimi, si:
•Stafi teknik dhe punëtorët e disponueshëm;
•Pajisjet dhe mjetet logjistike;
•Eksperienca e mëparshme;
•deklarimi i kontratave ne proces
2. Kërkon dokumentacion për të provuar këto kapacitete, përfshirë informacion mbi kontrata të tjera në zbatim që mund të ndikojnë në përmbushjen e kontratës së re.
3. Nëse një OE nuk arrin të dëshmojë se ka burime të mjaftueshme për të përballuar një kontratë të dytë të ngjashme, ai mund të skualifikohet për mungesë kapaciteti. Referencë ligjore:
• Neni 77 i Ligjit nr. 162/2020 – Parashikon që autoriteti kontraktor përcakton kriteret e veçanta të kualifikimit, përfshirë aftësinë për të përmbushur kontratën.
• Neni 25 i VKM nr. 285, datë 19.5.2021, i ndryshuar – Përcakton llojet e kapaciteteve të kërkuara dhe mënyrën e vlerësimit të tyre. Ndalim me mënyrë të drejtepërdrejtë zbatohet në kontratat e punëve publike lidhur me kriterin e drejtuesit teknik të kantierit sipas përcaktimeve të pikës 2.1 të Udhëzimit nr. 2, dt 15.05.2018 "Për zbatimin e punimeve të ndërtimit" I cili përcakton se për vepra të preventivuar me vlere mbi 30 million lekë, përgjegjesi teknik I kantierit është resident, me kohë të plotë në objekt dhe I diplomuar në inxhinieri ndertimi.

Përfundim: Pra, po, zbatohen filtra funksionalë, jo në formën e ndalimit të drejtpërdrejtë, por përmes vlerësimit të kapaciteteve ekonomike, teknike dhe organizative të OE-së. Autoriteti kontraktor ka të drejtën të mos lejojë fitimin e një kontrate të re, nëse operatori nuk provon që mund ta përmbushë në mënyrë të pavarur dhe efektive, pa cenuar kontratat ekzistuese.

Gentian

Pyetje: Ju lutem, a mund t'me shpjegoni si behet vleresimi me pike nga ana e institucionit kontraktor?
Përgjigje: I nderuar Gentian, faleminderit për interesimin tuaj. Vlerësimi me pikë i ofertave bëhet nga institucioni kontraktor në bazë të Ligjit nr. 162/2020 “Për prokurimin publik”, i ndryshuar, Vkm 285/2021 e ndryshuar si dhe dokumenteve të tenderit të shpallur. Ky vlerësim është pjesë e procedurës së përzgjedhjes së “ofertës ekonomikisht më të favorshme bazuar ne kosto”, e cila nuk bazohet vetëm në çmimin më të ulët, por në një kombinim të çmimit me elementë të tjerë cilësorë dhe ekonomikë. Si funksionon në mënyrë të thjeshtuar:
1. Caktohen kriteret e vlerësimit në dokumentet e tenderit Institucioni që shpall tenderin përcakton qartë në dokumentet e tij:
• cilat kritere do të përdoren për vlerësim;
• sa pikë ka secili kriter;
• dhe si do të bëhet vlerësimi (metodologjia).
Shembuj të kritereve të zakonshme:
• Çmimi i ofruar
• Cilësia teknike e produktit ose shërbimit
• Koha e dorëzimit apo zbatimit
• Përvoja në fushën përkatëse
• Zgjidhje teknike ose funksionale
• Angazhimi në standarde të cilësisë ose mjedisit (si ISO, EMAS, etj.)
2. Çdo ofertë merr pikë për secilin kriter
Komisioni i vlerësimit shqyrton ofertat dhe pikëzon ofertat e kualifikuar sipas metodës së përcaktuar më parë në dokumentet e tenderit. • Për kriterin e çmimit, oferta më e ulët merr pikët maksimale. Ofertat e tjera vlerësohen proporcionalisht sipas një formule të përcaktuar.
P.sh., nëse çmimi mbart 60 pikë dhe oferta më e ulët është 100 lekë, ajo merr 60 pikë. Një ofertë me 120 lekë mund të marrë 50 pikë, sipas formulës.
• Për kriteret cilësore (si përshkrimi teknik, përvoja, etj.), vlerësimi bëhet në një shkallë nga 0 deri në pikët maksimale, në varësi të cilësisë së informacionit të ofruar.
3.Llogariten pikët totale për çdo ofertë Pikët që ka marrë çdo operator për secilin kriter bashkohen dhe krijojnë pikët totale të ofertës. Fitues shpallet operatori me totalin më të lartë të pikëve, për sa kohë përmbush të gjitha kërkesat ligjore dhe teknike.
Baza ligjore për këtë proces është: • Neni 87 i Ligjit nr. 162/2020, i ndryshuar – Trajton mënyrën e vlerësimit dhe renditjes së ofertave në bazë të kritereve të shpallura dhe vlerësimit me pikë.
• Neni 88 i të njëjtit ligj – Përcakton çfarë është oferta ekonomikisht më e favorshme dhe se ajo mund të bazohet në çmim, kosto ose cilësi.
• Neni 45 i VKM nr. 285, datë 19.05.2021, “Për miratimin e rregullores së prokurimit publik”, i ndryshuar – Përcakton metodën e përllogaritjes së pikëve dhe përdorimin e kostos më të ulët, kur krahasohet më shumë se vetëm çmimi.
Përfundim: Vlerësimi me pikë është një metodë transparente dhe ligjërisht e rregulluar për të zgjedhur ofertën që ofron raportin më të mirë cilësi–kosto, dhe jo vetëm ofertën më të lirë. Kjo metodë siguron që kontrata të shkojë te një operator që përveç çmimit të përshtatshëm, ofron edhe cilësi, efikasitet dhe vlera të qëndrueshme për institucionin publik dhe shoqërinë. Nëse keni nevojë për sqarime të mëtejshme ose referenca të më detajuara nga legjislacioni në fuqi, jemi në dispozicion. Ju faleminderit!

Adrian

Pyetje: Si e garanton OBP transparencën dhe efikasitetin në proceset e blerjeve të përqendruara që realizon?
Përgjigje: Faleminderit për interesimin dhe pyetjen tuaj. Operatori i Blerjeve të Përqendruara garanton transparencën dhe efikasitetin në proceset e prokurimit përmes një sërë mekanizmash të vendosur në çdo hallkë të procedurës. Transparenca sigurohet përmes:
•Publikimit në kohë reale të çdo procedure në faqen zyrtare të OBP dhe në sistemin elektronik të prokurimit;
• Njoftimit automatik për operatorët ekonomikë të regjistruar sipas kategorive të interesit;
• Vendosjes së dokumentacionit standard dhe katalogëve të unifikuar në dispozicion të të gjitha palëve, per mallra kryesisht pa asnjë tarifë;
• Aksesit të barabartë në informacion për të gjithë operatorët e tregut. Efikasiteti arrihet përmes:
• Qendrimit të unifikuar dhe standardizuar të specifikimeve teknike, që redukton kohën dhe kostot e përgatitjes së dokumentacionit;
• Bashkimit të nevojave të autoriteteve kontraktore në kontrata të përqendruara, duke siguruar ekonominë e shkallës;
• Monitorimit të vazhdueshëm të tregut për të garantuar konkurrencë të ndershme dhe çmime optimale;
• Përdorimit të sistemit Alb-Zone për hartimin teknik dhe referencimin profesional të kërkesave. Këto mekanizma ndërtojnë një proces të qëndrueshëm, transparent dhe të besueshëm për të gjithë aktorët pjesëmarrës.

Ilir

Pyetje: Sa ju kane ardhur ne ndihme operatoreve ekonomike kto sherbimet qe ju keni ne faqe dhe a aplikoni tarifa dhe per operatoret ekonomike si per autoritetet?

Përgjigje: Shërbimet që OBP ofron në faqen zyrtare janë konceptuar pikërisht për të lehtësuar aksesin dhe transparencën për operatorët ekonomikë.
Ndër më të rëndësishmit është njoftimi automatik për çdo procedurë prokurimi të publikuar nga OBP, i cili u dërgohet operatorëve që janë regjistruar si të interesuar për kategori të caktuara prokurimi.
Ky shërbim është falas dhe ndihmon në informimin e menjëhershëm të OE-ve pa patur nevojë për kërkime të avancuara. Gjithashtu, çdo procedurë e re e publikuar nga OBP publikohet menjëherë në faqen zyrtare, pa kufizime apo barriera aksesimi për përdoruesit.
Kjo mënyrë komunikimi siguron barazi informacioni për të gjithë pjesëmarrësit në treg. OBP nuk aplikon asnjë tarifë as për operatorët ekonomikë, as për autoritetet kontraktore, për aksesin në këto shërbime. Për autoritetet kontraktore, ofrohet gjithashtu akses falas në katalogët e unifikuar dhe të standardizuar, si dhe në sistemin Alb-Zone, i cili mbështet hartimin dhe zhvillimin e dokumentacionit teknik dhe specifikimeve standarde për procedurat e prokurimit. Paralelisht, jemi duke zhvilluar shërbime të reja të dedikuara për operatorët ekonomikë, të cilat do të përmirësojnë më tej ndërveprimin me sistemin dhe do të rrisin transparencën në mënyrë të vazhdueshme.

Martin

Pyetje: Cilat janë llojet e prokurimeve qe kryen OBP?

Përgjigje: Përshëndetje Martin, për të parë listën e plotë të objekteve të prokurimit që mbulon Operatori i Blerjeve të Përqendruara, ju ftojmë të referoheni në faqen zyrtare tonë www.obp.al.
Kjo listë bazohet në Vendimin e Këshillit të Ministrave nr. 531, datë 7.9.2023, i cili ka pësuar ndryshime dhe është zgjeruar me objekte të reja, që tashmë janë të reflektuara në web-in tonë. Megjithatë, referuar pikës 12 të kësaj VKM-je, OBP është i autorizuar të zhvillojë çdo lloj procedure prokurimi për mallra, shërbime apo punë të kërkuara nga autoritetet/entet kontraktore, edhe nëse objektet nuk janë të listuara në mënyrë të shprehur, për sa kohë institucioni kërkon asistencë dhe nuk ka kapacitete të mjaftueshme teknike për ta zhvilluar vetë procedurën. Për çdo rast konkret, na kontaktoni dhe jemi të gatshëm të verifikojmë nëse objekti në fjalë mbulohet nga OBP apo mund të trajtohet me procedurë të dedikuar.

Ina

Pyetje: Lejohet te prokurohet sherbimi i mirembajtjes per 7 sisteme informatike te ndryshme ne nje procedure te vetme prokurimi?

Përgjigje: Përshëndetje Ina, dhe faleminderit për pyetjen! Po, është e mundur të prokurohet shërbimi i mirëmbajtjes për disa sisteme informatike në një procedurë të vetme, por kjo varet nga disa kritere të rëndësishme që duhet të respektohen për të garantuar ligjshmërinë dhe konkurrencën: 1.Sistemet duhet të kenë lidhje funksionale/logjike ose të jenë pjesë e një strukture të përbashkët P.sh., nëse janë sisteme që operojnë brenda të njëjtit institucion, ndajnë infrastrukturë të përbashkët, apo kërkojnë ndërveprim të vazhdueshëm dhe bashkimi është i justifikueshëm. 2. Specifikimi teknik duhet të jetë i qartë për secilin sistem Kjo shmang paqartësinë dhe ndihmon operatorët ekonomikë të kuptojnë saktësisht çfarë pritet nga ta për çdo komponent. 3. Nuk duhet të përjashtojë konkurrencën. Nëse bashkimi i shumë sistemeve do të pengonte pjesëmarrjen e operatorëve të vegjël ose të specializuar vetëm për një sistem, atëherë rekomandohet ndarja në lote. Sugjerim i OBP: • Mund të përdorni një procedurë të vetme me lote të ndara për çdo sistem, duke u dhënë OE-ve mundësinë të aplikojnë për një ose disa lote. • Ose të aplikoni një bashkim operatorësh ekonomikë, kur kërkohet mbulim i plotë i të gjitha sistemeve. Në çdo rast, për vendimmarrje të qartë dhe dokumentim të mirë, sugjerojmë të përgatitet një analizë paraprake që justifikon zgjedhjen e strukturës së procedurës.

Albion

Pyetje: A mund te marrim konsulence nga ju per perdorimin e kritereve sociale dhe mjedisore pasi kemi pare qe i aplikoni sakte dhe kuptueshem?

Përgjigje: Përshëndetje Albion, faleminderit për pyetjen!

Po, patjetër që mund të ofrojmë konsulencë. OBP është trajnuar nga organizma kombëtarë dhe ndërkombëtarë për përdorimin e kriterieve sociale dhe mjedisore në prokurime, dhe aktualisht jemi në proces të zhvillimit të një udhëzuesi teknik praktik për përdorim të gjerë.Kriteret sociale dhe mjedisore janë pjesë e angazhimeve tona strategjike për blerje të qëndrueshme dhe përfshirëse. Ne i kemi aplikuar tashmë në disa kategori prokurimi ku mund ti aksesoni në sistem lehtesisht

Era

Pyetje: A eshte me mire te perdoret me shume marrevshja kuader per procedura te prokurimit publik te cilat jane te vazhdueshme? Per te kursyer kohe, burime njerezore dhe me shume efektivitet? Dhe pse jo per cmime me konkurruese?

Përgjigje: Përshëndetje Era, dhe faleminderit për pyetjen shumë të goditur! Po, praktikisht përdorimi i marrëveshjeve kuadër për prokurime të përsëritura dhe të parashikueshme është një nga mënyrat më efektive për të kursyer kohë, burime njerëzore dhe për të rritur transparencën. Në Strategjinë e OBP-së 2025–2027, është parashikuar zgjerimi i përdorimit të kontratave kuadër, veçanërisht në kategori ku: • kërkesat janë të vazhdueshme • tregu është i njohur dhe analizueshëm, • institucionet kërkojnë zgjidhje më fleksibël dhe të shpejta. Përfitimet janë të qarta: • procedura e thjeshtuar për autoritetet publike, • çmime më të mira për shkak të volumit dhe konkurrencës paraprake, • përgjigje më të shpejta ndaj nevojave operative. Dhe pyetja juaj “Pse jo për çmime më konkurruese?” është shumë me vend. Në fakt, marrëveshjet kuadër nuk përjashtojnë konkurrencën, përkundrazi: • mund të lidhen me shumë operatorë dhe • brenda tyre mund të zhvillohen mini-konkurse për të marrë ofertën më të mirë për momentin. Po punojmë që këto marrëveshje të jenë edhe më të aksesueshme për të gjitha AK-të, përmes katalogjeve të standardizuara dhe platformës së re e-AlbZone.

Eri

Pyetje: Mendoni se krijimi i nje sistemi per monikonkurrimin do e bente me te thjeshte procesin? Keni marre hapa per te?

Përgjigje: Përshëndetje Eri, faleminderit për pyetjen shumë me vend! Po, pjesë e Strategjisë së OBP-së 2025–2027 është pikërisht zhvillimi i mekanizmave të monitorimit të konkurrencës në prokurimet publike, si një mënyrë për të rritur transparencën dhe eficiencën. Aktualisht jemi në fazën përgatitore të platformës së re digjitale “e-AlbZone”, e cila do të shërbejë jo vetëm për administrimin e katalogjeve, dhe porosite on line, por edhe si një instrument për monitorimin e tregut. Kjo platformë do të na ndihmojë të analizojmë: • sa operatorë marrin pjesë në procedura, • ku ka konkurrencë reale dhe ku mungon, • si evoluojnë çmimet për mallra dhe shërbime të përsëritura. Qëllimi është ta bëjmë procesin më të thjeshtë, më të drejtë dhe të matshëm, si për ne si organ qendror, ashtu edhe për institucionet që na besojnë prokurimet. e-AlbZone do të jetë një platformë monitoruese dhe dinamike, që i jep kuptim konkret vizionit të strategjisë sonë, “blerje të mençura për shërbim më të mirë publik.”

Prokuruesi

Pyetje:Përshëndetje.Nëse në një procedure prokurimo 55% te fondit limit e perbehet nga objekte te prokurueshme me LPP dhe 45% me legjislacionin ne fushen e mbrotjes dhe sigurise: me cfare legjislacioni zhvillohet procedura? flm

Përgjigje: Përshëndetje dhe ju faleminderit për interesimin dhe pyetjen tuaj. Në rastet kur një procedurë prokurimi përfshin një kombinim objektesh të mbuluara si nga legjislacioni i prokurimeve publike (LPP), ashtu edhe nga ai në fushën e mbrojtjes dhe sigurisë, përcaktimi i legjislacionit të zbatueshëm nuk bazohet në ndarjen përqindore të fondit limit, por në natyrën dhe objektin kryesor të kontratës. Ky parim mbështetet në nenin 5, pika 2 të Ligjit nr. 162/2020 “Për Prokurimin Publik”, i cili përcakton se: “Në rast të një kontrate publike me objekt të përzier, autoriteti kontraktor përcakton rregullat që do të zbatohen, në përputhje me objektin kryesor të kontratës.” Në këtë kuptim, përqindja e fondit mund të shërbejë si një tregues ndihmës për analizën, por nuk përbën bazë të vetme apo vendimtare për zgjedhjen e kuadrit ligjor të zbatueshëm. Analiza duhet të bazohet mbi funksionin dominues të kontratës dhe mbi qëllimin për të cilin ajo lidhet. OBP mbetet në dispozicion për të mbështetur çdo institucion për vlerësimin e drejtë dhe të unifikuar të rasteve konkrete, në funksion të respektimit të ligjit dhe standardeve të transparencës në prokurim.

Sibora

Pyetje: Përshëndetje ! Kur në një procedure kemi kriter, plotësimin e tabelës për mallrat objekt prokurimi dhe na kërkohet vëndi origjinës së mallit, Autoriteti Kontraktor na kërkon origjinën e lëndës së parë me të cilën prodhohet produkti apo vëndin ku prodhohen mallrat objekt prokurimi?

Përgjigje: Faleminderit për pyetjen. Në rastet kur në dokumentacionin e një procedure prokurimi kërkohet deklarimi i vendit të origjinës për mallrat objekt prokurimi, nënkuptohet vendi ku prodhohen përfundimisht këto mallra, dhe jo vendi i origjinës së lëndës së parë që përdoret për prodhimin e tyre. Origjina përcaktohet sipas vendit ku malli i nënshtrohet përpunimit të fundit të rëndësishëm, që rezulton në përgatitjen e produktit përfundimtar. Prandaj, kur plotësoni tabelat përkatëse, ju lutemi të deklaroni vendin ku është prodhuar produkti përfundimtar, që është objekt i prokurimit.

Forum

Xhensila

Mikaela

Mikaela

Marsi

Gentian

Adrian

Ilir

Martin

Ina

Albion

Era

Eri

Prokuruesi

Sara

Arber

Martina

Kristi

Armand

Sibora

Operator Ekonomik

Andi

Anila

Eva A

Adresa

Kontakt

Kontakto Administratorin

Politikat e Privatësisë