U mbajt ditën e enjte, data 13 mars, konferenca për shtyp mbi vitin e parë të suksesit të funksionimit të OBP, në kuadër të transparencës ndaj publikut për të krijuar një dialog dhe komunikim të hapur me median në vend.
Në fjalën e tij, Ministri i Ekonomisë, Kulturës dhe Inovacionit, z. Blendi Gonxhe e cilësoi organin qendror blerës OBP si të shëndetshëm për ekonominë e vendit, duke theksuar konkurrueshmërinë, transparencën, dhe menaxhimin e fondeve në mënyrë efikase. Ai gjithashtu përmendi risitë në aspektin teknologjik, si platfoma AlbZone dhe kategoria “Regjistrohu si Operator Ekonomik” dhe shprehu mbështetjen e tij për zhvillimin e mëtejshëm përmes E-Albzone. Në fjalën e tij ai veçoi arritjet e OBP, e cila ndër të tjera ka realizuar 20.4 milion euro kursim të buxhetit të shtetit, 76% më shumë fonde të prokuruara krahasuar me vitin 2023, si dhe 46% më shumë procedura të zhvilluara se në 2023. Ai shtoi se OBP ka mundësuar rritje të konkurrueshmërisë, me mesatarisht 4.7 operatorë për tender, krahasuar me 2.7 në vitin 2023.
Administratorja e OBP, Znj. Arlinda Pogaj në fjalën e saj theksoi dy drejtimet kryesore të punës së OBP, që konsistojnë në menaxhimin e përditshëm i procedurave të prokurimit, duke mundësuar transparencë dhe efikasitet në çdo prokurim të ndjekur si dhe në ndërtimin e vizionit për të ardhmen duke u ndalur në Inovacionin, dixhitalizimin dhe optimizimin e proceseve për të transformuar sistemin e prokurimeve publike.
Ndër të tjera, Znj. Pogaj veçoi si arritje kryesore të OBP në vitin e pare:
✅ Asistenca teknike nga UNOPS – Implementimi i praktikave më të mira ndërkombëtare.
✅ Krijimi i AlbZone – Një platformë dixhitale inovative për porositjen e mallrave nga
institucionet publike.
✅ Zhvillimi i katalogut të mallrave – Standardizimi i produkteve dhe çmimeve për më shumë transparencë dhe lehtësi.
✅ Optimizimi i kohës për prokurime – Reduktim drastik i kohës nga muaj në minuta për të
gjitha kërkesat.
✅ Kursimi i 20.4 milionë eurove në financat publike në vetëm 8 muaj.
✅ Zgjerimi i bashkëpunimit me institucionet publike për të maksimizuar ndikimin e OBP.
Ajo shtoi se OBP është duke ndikuar pozitivisht në komunitet edhe përmes prokurimit social, ku përmes marrëveshjes me AKPA – Prokurimet nuk janë vetëm procedura teknike, por një mekanizëm për punësim dhe integrim social. Kjo marrëveshje konsiston në përfshirjen e punëkërkuesve në kontratat publike duke mundësuar që në çdo tender të punësohen grupet vulnerabël.
Znj. Pogaj ndau me të pranishmit edhe vizionin për të ardhmen, duke veçuar:
- Dixhitalizimi i plotë i prokurimeve – Zhvillimi i platformës e-AlbZone për blerje të drejtpërdrejta online.
- Rritja e transparencës dhe konkurrencës – Më shumë operatorë ekonomikë të përfshirë.
- Zgjerimi i katalogëve me mallra dhe shërbime të unifikuara.
- Përgatitja e strategjisë 3-vjeçare të zhvillimit të OBP.
- Forcimi i kapaciteteve të stafit – Trajnime dhe asistencë teknike ndërkombëtare.
